عن خلي بالك من زيزي وأشياء أخرى

إمبارح كنت قاعدة في أوضة المدرسات مع صحابي وبكلمهم عن قد إيه مهنتنا - كمدرسين- دي غيرت في شخصيتنا ونمّت عندنا الوعي عن نفسنا وطورت من مهارتنا الاجتماعية والسلوكية والنفسية وإننا زي ما ساعدنا أطفال كتير يكونوا أحسن إحنا كمان بقينا أحسن..

لمّا كنت صغيرة كنت طفلة شقية جدًا لدرجة لسة بتتحاكى بيها عيلتي ومدرسيني وكل اللي كانوا عارفنّي .. بتحرك كتير جدا بسرعة كبيرة جدًا ومحدش بيلاحق على مصايبي..

مستوايا الدراسي كان عالي الحمد لله، بس عمري ما عرفت أجيب أعلى من ٩٦٪.. طبعا دا مستوى دراسي عالي بس كمدرسة أنا عارفة إن اللي يجيب ٩٦٪ يقدر يجيب ١٠٠ ٪، بس للأسف تركيزي مكنش بيجيب.. كنت بزهق.. بزهق من آخر سطرين في كل درس في أي مادة، بزهق إني أراجع قبل ما أسلٍّم ورقة الامتحان، بزهق من المذاكرة وفيه اوقات كان بيبقى مخي عامل زي دوشة التلفزيون.. مش قادرة أركز.. مش عارفة أذاكر كلمة ومش عارفة أحصّل أي حاجة..

أي حاجة مهمة في حياتي كنت بعملها بكون يا إما مركزة جدا وبدخل اعملها فبتفوق فيها، يا إما مش عارفة أركز فحرفيا بسقط فيها.. قعدت كذا سنة بعد التخرج مش عارفة أشتغل لأني مش بركز في الانترفيو، وحتى لما بشتغل بترفد في الفترة التجريببة اللي في الأول عشان التركيز..

لحد ما في يوم قدمت على شغلي دا، ومن كتر القلق من الفشل قررت أذاكر، أذاكر الانترفيو، وأتوقع كل الأسئلة وأحفظها عشان أي سؤال اتسئله أعرف أرد عليه وما اتلجلجش.. والحمد لله اشتغلت وبقيت مُدرِّسة.. مكنش دا المجال اللي حابة اشتغل فيه، بس كملت لإني كنت تعبت من الفشل في إني ألاقي شغل زي زيزي 😀.. 

من خمس سنين وكان أول يوم ليا كمدرسة فصل بعد سنتين تدريب، دخل طفل الفصل، داخل بصدره كدا ومش شايف بني آدمين، كتلة عشوائية ماشية على الأرض، مش بيقعد على كرسي، بيقاطعني في الكلام، دايما عندي عند السبورة، مكنش بيسكت غير وهو ماسك كتاب أو مجلة قاعد بيقرا فيهم.. فكرني بنفسي تماما، مكنتش بقعد ساكتة غير وأنا بقرأ.. الولد مع الوقت كان بيتعبني جدا وطلبت مساعدة الاخصائية النفسية في المدرسة وكان أول مرة أسمع كلمة

ADHD، واللي هو أهلا وسهلا تشرفنا مين حضرتك..

بمساعدتها وبالمعلومات اللي قالتهالي وقرايتي للموضوع بدأت أعرف إني بتعرف على نفسي أنا شخصيًا..

عرفت إني لازم أقلل السكر والمقليات أو أمنعهم عشان أبقى أحسن، عرفت إني لازم أحاول أعمل حاجات تانية أخرج بيها طاقتي، عرفت إني عشان أقدر أحتفظ بتركيزي لازم دوايري ما تبقاش كتير، ويمكن دا السبب إني دايما عندي صديقات مفردة كتير جدا مش شلة بعينها، مش بعرف أركز، عرفت إني لازم أركز إني أركز 😀

في نفس السنة كنت بدأت دبلومة المنتسوري، اللي هي شقلبت حياتي رأسًا على عقب، عرفتني إن قمة التعلّم عند الأنسان مش إني أعلمه لغة وحساب وعلوم، قد إني اعلمه إزاي يركز، وإزاي يقدر يشتغل في مكان مليء بالحركة ومع ذلك يقدر ينعزل عن كل حاجة ويتوحد مع الحاجة دي ويعملها، لما يعرف يركز ويجمع شتات عقله بعدها هيكون قادر إنه يتعلم أي حاجة وكل حاجة بمنتهى الإتقان والانتباه.

سنة ورا سنة بقى يجيلي ولاد كتير عندهم نفس المشكلة أو مشكلات مشابهة، بقيت بشوف نفسي فيهم وبتواصل مع أهاليهم وبكون بتكلم عنهم مع أهاليهم بحماسة شديدة كأني بتكلم عن نفسي.. " ابن حضرتك مش قادر يركز.. ابن حضرتك عقله عامل زي الفرقع لوز بيتنطنط من فكرة للتانية.. ابن حضرتك ذكي جدًا والله وعارف كل الحاجات بس بيجاوب غلط عشان بيقول أي حاجة بيكون بيفكر فيها دلوقتي".

فيه المحظوظين اللي اهاليهم تعاونوا عشان يخففوا تعبهم ومعانتهم في الدراسة وفي الحياة.. وفيه اللي هيعانوا كتير عشان يقدروا يعرفوا يبقوا أحسن لما يكبروا لأنهم ببساطة أهاليهم كانوا كسلانين جدًا إنهم يشتغلوا عليهم .. بس الحقيقة إن مكنش فيه أي حد محظوظ قدي لإني مع الوقت قدرت أبقى أحسن كتير جدًا وعرفت عن نفسي وإزاي اتعامل معاها وإزاي أروض تركيزي وإزاي اطوّعه عشان أقدر أعمل أي حاجة أنا عايزاها.. 

من حلقتين توقعت إن زيزي في المسلسل هتكون هي شادو تيتشر لتيتو، وفي رأيي هيكون أحسن علاج ليهم هما الاتنين، لإن لمّا البنت الكبيرة هتركز مع البنت الصغيرة هتكون في نفس الوقت بتركز مع نفسها وبتشتغل عليها.. كأنها هتبدأ حياة جديدة.. كأنها هتتولد من جديد.. لأن أفضل طريقة إنك تتعلّم حاجة هي إنك تعلّمها لحد.. 

أنا ممتنة جدًا لمهنتي.. التدريس.. اللي هي صناعة الإنسان.. اللي هي جعله أحسن حاجة ممكن يكونها.. ممتنة لأنها علمتني إن الإنسان لازم يشتغل على نفسه طول الوقت ويتطور ويكون عنده الشجاعة لاكتشاف عيوبه والمرونة إنه يغيرها ويديرها.. لأن مفيش إنسان غبي بس فيه إنسان " غير مرن“.. 

وممتنة جدًا لكل الناس اللي ساعدتني في الرحلة دي وعلى رأسهم ولادي اللي درستلهم لإني فعلا لو ما كنتش عرفتهم مكنتش بقيت الإنسان اللي أنا عليه دلوقتي..

شكرًا كمان إن أخيرًا حد كتب حاجة حلوة ومحترمة وهادفة عن الإنسان وإزاي نطوره ونخليه أحسن وفعلا ربنا يجعله في ميزان حسنات صناع المسلسل الجميل دا..